Radio Oxygène tounen an fòs gras a enèji solè: bagay yo chanje!
Komin PlezansdiSid repran souf li, respire yon lòt lè, depi radyo Souf lavi a tounen ak pwogramasyon l. A pati jodi, 13 jiyè 2023, Radio Oxygène repran difizyon regilye li soti 5è nan maten rive 5è nan aswè. Nou retounen tou ak OLN (Oxygène Live Night) ki pèmèt nou pase nuit ansanm chak samdi. Bèl nouvèl sa se gras a yon sibvansyon Fondasyon Konesans ak Libète (FOKAL) ki ba nou yon sibvansyon 6500 dola pou n ka achte yon sistèm solè pou radyo a epi bay yon bourad nan mete Radio Oxygène sou entènèt.
Inisyativ sa make yon tounan enpòtan nan listwa radyo a ki, depi 10 janvye 2005, ap akonpaye lavi moun nan Plezans ak 5 lòt depatman peyi a kote radyo a rive. S on inisyativ pou ranfòse angajman nou pran pou kontinye travay ak kominte yo epi kontinye bay enfòmasyon ki itil epi ki gen bon kalte.
Se ekip solid DanaOne Communications an, yon ekip ki gen nan tèt li, teknisyen veteran Dieuné St Clermont – ki avèk nou depi radyo a kòmanse – ki te fè enstalasyon sistèm solè a. Gras a ekip sa, radyo lavi a fè tranzisyon sa pou l gen pwòp sistèm enèji pa li, epi yon enèji pwòp, dirab, ki pa nan tonbe ankò, pou tout oditè ak tout oditris ka tande radyo a san pwoblèm.
Yon pwojè pi laj pou kontinye enfòme epi konekte moun ak moun
Se ak retransmisyon an dirèk 24triyèm Konvansyon anyèl Misyon Batist Betèl la, radyo a repran sèvis nòmal; yon fason pou radyo a montre kapasite l pou li akonpaye kominote a nan difize evènman ki enpòtan pou li. Gras a moman sa, radyo a retounen jwe wòl li kòm yon medya ki enfòme epi konkete abitan rejyon an.
Envestisman nan sistèm solè sa nan yon pwojè pi laj pou ranfòse kapasite radyo a. Jefò kobine Fondation Guillaume, Fondation Déclic (patnè radyo a depi 2015) ak kominote Plezans di Sid la pèmèt nou refòme radyo sa ki byen chita nan kominote a. Gras a jefò sa yo nou kontinye prezève epi devlope vwa lokal sa ki esansyèl pou devlòpman kominote ki « andeyò » tankou PlezansdiSid ak lòt komin tankou l yo.
Fondation Guillaume, ki se manman radyo a, achte ekipman, ranje ekipman, peye abòman entènèt, peye teknisyen pou travay ranfòsman an ka fèt. Fondation Déclic fòme animatè ak atizan radyo a, devlope nouvo griy pwogramasyon radyo, develope sit entènèt ak estrateji nimreik radyo a. Fokal bay lajan pou sistèm solè a. Men, moun ki pi enpòtan nan pwojè sa, vre fòs radyo a, se kominote Plezans lan kote majorite atizan benevòl ki fòme ekip radyo a soti. Pasyon yo, devouman yo, ak lanmou yo pou kominote a parèt nan chak segond nou difize. Angajman yo pèmèt radyo a kontinye egziste. Nou di yo mèsi pou sa!
Yon desizyon pou kontinye santre vwa lokal
Radio Oxygène ki retounen ak yon sèvis konplè ak enstalasyon nouvo sistèm enèji solè sa, se yon bon bagay pou avansman kominote n yo. Se yon senbòl non sèlman angajman tout moun ki enplike yo pou pwoteje anviwònman an men tou atachman yo genyen pou koneksyon kominotè ansanm ak difizyon enfòmasyon ki fè sans pou moun k ap koute radyo a. Nouvo pwogramasyon radyo a montre sa. Li baze l sou yon jounalis pwoksimite ki fokalize sou kominote a menm lè l vire gade sa k ap fèt lòt kote, kit se nan kapital la oubyen aletranje.
Angajman nou rete menm nan. Li pa chanje. Vwa Radio Oxygène ap kotinye pote, chak segonn, une bouffée d’air frais pou oditè ak oditris yo.
